Undanfarin ár hafa fulltrúar ÍFS unnið að því með nágrönnum okkar á Grænlandi að byggja upp og kynna frisbígolf þar í landi enda trúum við því að folfið geti orðið jafn vinsælt þar og hér á Íslandi. Þessi vinna okkur hefur skilað því að nú eru komnir 4 vellir en við höfum verið með áhersluna á höfuðstaðinn Nuuk og komið beint að því verkefni. Með styrk frá Norræna höfuðborgarsjóðnum höfum við tvisvar sent fulltrúa til Grænlands til að skoða aðstæður og undirbúa með heimamönnum.
Okkar reynsla er m.a. sú að mikilvægt sé að vanda vel til verka og setja t.d. heilsársteiga strax til að mæta þeim erfiðu veðuraðstæðum sem þessi lönd búa við. Þannig er möguleiki að spila fleiri mánuði ársins, jafnvel allan veturinn án þess að bleyta, hálka eða snjór hindri notkun.

Í september 2025 fóru Birgir Ómarsson og Ólafur Haraldsson til Nuuk til fundar við embættismenn í Sermersooq sýslu en tilgangur ferðarinnar var að undirbúa finna heppilega staðsetninu á fyrsta vellinum í Nuuk og undirbúa jarðveginn fyrir sportið. Skemmtilegt útivistasvæði í grennd við Háskólann varð fyrir valinu og í þeirri ferð var hannaður 9 brauta völlur sem settur var upp núna september 2026 og eru íbúar Nuuk þegar byrjaðir að nota völlinn og spila. Verið er að klára smíði á teigum og er stefnt að því að þeir verði settir upp fyrir veturinn.

Grænlendingar eru mikil útivistarþjóð og hreyfa sig mjög mikið. Við teljum því líklegt að frisbígolfið passi vel inn í þeirra daglegu frístund og vonum auðvitað að það slái í gegn eins og hér. Það er mikill áhugi á að senda hóp til Grænlands fljótlega til að hitta og spila með heimafólki og vonandi getur það orðið innan skamms. Við hvetjum okkar fólk sem er á ferðinni til Nuuk að taka diskana með og prófa þennan skemmtilega völl í alveg ótrúlegu mögnuðu landslagi. Við vorum að setja völlinn inn á UDisc.

Góður félagi okkar í frisbígolfinu, Ólafur Ingi Heiðarsson, varð bráðkvaddur þann 13. september síðastliðinn, aðeins 45 ára að aldri. Ólafur hefur verið öflugur þátttakendi í okkar samfélagi í mörg ár og hefur fylgt syni sínum ötullega á flestum mótum sem haldin hafa verið auk þess að vera mjög góður spilari sjálfur. Óli skilur eftir sig stórt skarð í frisbígolfsamfélaginu og honum til heiðurs verður sérstakt minningarmót haldið sunnudaginn 4. október þar sem allur ágóði mótssins renna til fjölskyldu Ólafs.
Mótið er öllum opið en keppt verður í tveggja manna liðum með Texas fyrirkomulagi þ.e. betri diskur gildir.

Undanfarin þrjú ár hafa öflugir aðilar á Egilsstöðum unnið að því að koma upp 18 brauta velli í Selskógi sem er vinsælt útivistarsvæði við Egilsstaði.
Uppbygging á vellinum hefur staðið yfir síðan 2024 og er framkvæmdum að ljúka haustið 2026. Völlurinn er 18 holu keppnisvöllur í hæsta gæðaflokki og á honum eru m.a. tvær körfur á nokkrum brautum og tveir til þrír teigar. Venjulegur hringur er PAR 58 með 1773 m kastlengd. Selskógur er aðal útivistarsvæði Egilsstaðabúa og biðjum við spilara að bera virðingu fyrir öðrum gestum í skóginum.

Við óskum Austfirðingum til hamingju með glæsilegan völl og hvetjum auðvitað alla til að grípa diskana og spila hring.

Dagana 8.-12. september fór fram Heimsmeistaramót landsliða í frisbígolfi (WTDGC) en mótið var haldið í þetta sinn í Vilnius í Litháen. Ísland sendi í fyrsta sinn eigið landslið og taldi hópurinn alls 15 manns sem er auðvitað frábært.
Við tefldum fram tveimur liðum á mótinu, annars vegar í Opnum flokki (OPEN) og hins vegar í Stórmeistaraflokki (Masters) sem er fyrir 40 ára og eldri.

Keppt var í holukeppni (match play), með svipuðu fyrirkomulagi og margir þekkja úr Ryder Cup í boltagolfinu. Hver hola skiptir því máli og keppt er fyrir liðið. Ísland stóð sig með prýði og endaði í 18. sæti af 28 liðum í Opnum flokki og í 16. sæti af 18 liðum í Stórmeistaraflokki (Masters).

Mótið verður haldið aftur eftir tvö ár og Ísland mun senda aftur lið á það mót og jafnvel enn stærri hóp.

Íslandsmótið í frisbígolfi var haldið nýlega en spilaðir voru fjórir hringir til skiptis í Gufunesi og Grafarholti. Sex Íslandsmeistarar voru krýndir í lok móts:

Kvennaflokkur (FPO) María Eldey Kristínardóttir
Opinn meistaraflokkur (MPO) Blær Örn Ásgeirsson
Kvennaflokkur 40 ára og eldri (FP40) Katerina Zbytovska
Stórmeistaraflokkur 40 ára og eldri (MP40) Pétur Gunnarsson
Stórmeistaraflokkur 50 ára og eldri (MP50) Jóhannes Bjarki Sigurðsson
Ungmennaflokkur 18 ára og yngri (MJ18) Birtir Ingason

Fyrr í sumar var haldið Íslandsmeistaramót barna og voru verðlaun fyrir 18 ára flokkinn einnig afhent í lok þessa móts. Á myndina vantar Jóhannes Bjarka Sigurðsson.

Við óskum sigurvegurum og öllum sem tóku þátt til hamingju með árangur sinn í keppninni.

Íslandsmótið í betri disk verður haldið sunnudaginn 5. júlí á Grafarholtsvelli. Keppt er í tveggja manna liðum og betra kast gildir. Til að tryggja jafna þátttöku beggja leikmanna má annar aðilinn ekki eiga þrjú upphafsköst í röð. Liðin velja sér rástíma en boðið er upp á 4 keppnisflokka.

Skráning og nánari upplýsingar eru hér: https://udisc.com/events/islandsmotid-i-betri-disk-2026-D3IEyg/about

Íslandsmót barna í frisbígolfi fer fram laugardaginn 4. júlí 2026 á Grafarholtsvelli (Þorláksgeisla 51) en keppt verður í 6 aldursflokkum, bæði stelpu og stráka. Við leggjum áherslu á að mótið sé skemmtileg upplifun fyrir keppendur og hvetjum öll börn, 18 ára og yngri til að taka þátt.

Í upphafi móts verður farið yfir helstu reglur og því ekki krafist að krakkar hafi keppnisreynslu. Foreldri eða forráðamaður þarf að fylgja börnum 12 ára og yngri. Elstu þrír flokkarnir spila á stóra vellinum en hinir flokkarnir spila Græningjann. Engin vallarmörk og kvaðir verða í gildi á mótinu. Veitt eru verðlaun fyrir 3 efstu sætin í hverjum flokki en einnig eru dregnir aukavinningar úr skorkortum. Púttkeppni verður í gangi allan daginn og pylsur, drykkir og Candyflos fyrir keppendur.

Boðið er upp á sex aldursflokka, bæði stelpu og stráka: 18, 15, 12, 10, 8 og 6 ára og yngri (Miðað er við fæðingarár)

DAGSKRÁ ÍSLANDSMÓTSINS LAUGARDAGINN 4. JÚLÍ 2026
Kl. 10.00   6 ára og yngri (f. 2020) – Græningi, 1 hringur (6 valdar brautir)
Kl. 10.30   8 ára og yngri (f. 2018) – Græningi, 1 hringur (12 brautir)
Kl. 11.00 10 ára og yngri (f. 2016) – Græningi, 2 hringir (24 brautir)
Kl. 13.00 12 ára og yngri (f. 2014) – Stóri völlurinn, 18 brautir (rauðir teigar)
Kl. 13.30 15 ára og yngri (f. 2011) – Stóri völlur, 18 brautir (stelpur rauðir/strákar hvítir)
Kl. 14.00 18 ára og yngri (f. 2008) – Stóri völlur, 18 brautir (stelpur hvítir/strákar bláir)

Keppnisgjald er aðeins 500 kr. á barn. Skráning er á folf@folf.is og á staðnum.
Mótið er samvinnuverkefni ÍFS og FGR

Frisbígolfvöllum fjölgar alltaf á hverju ári en þeir eru orðnir 105 um allt land. Segja má að hægt sé að finna folfvöll í nánast öllum sveitarfélögum landsins og á þeim fáu stöðum sem ekki er völlur eru viðræður í gangi.

10 átján brauta völlurinn var opnaður í sumar en þá var völlurinn á Hvolsvelli stækkaður og settir heilsársteigar á allar brautir. Þessir vellir eru Gufunesvöllur, Grafarholtsvöllur, Reykjanesbær, Selfoss, Úlfljótsvatn, Ljósafoss, Hvolsvöllur, Egilsstaðir, Hamrar og Háskólavöllurinn á Akureyri.

Við hvetjum ykkur öll sem þið ætlið að ferðast um landið í sumar að taka diskana með og prófa allla þá velli sem verða á leið ykkar í sumarfríinu.

Síðasta sunnudag var haldið fyrsta Silfurmót Íslandsbikars ÍFS en Silfurmótin eru stök frisbígolfmót sem eru ætluð þeim sem eru að spila sín fyrstu skref í keppnisfolfi. Mótið var haldið á tveimur völlum, Guðmundarlundi og Vífilsstöðum en spilaður var einn hringur á hvorum velli.
Góð þátttaka var á mótinu en 46 keppendur voru skráðir til leiks í sex flokkum.

Silfurmótin halda áfram og hvert mót er sjálfstætt þó að þau séu hluti af mótaröð þannig að öllum er velkomið að taka þátt og hvetjum við folfara til að slá til. Næsta Silfurmót verður haldið á Akureyri en sjá má dagskrána hér: https://www.folf.is/keppnir/silfurmotarodin/

Sumarið er tíminn á svo sannarlega við frisbígolfið þó að vetrarspilamennska hafi færst í aukanna. Framundan er skemmtilegur tími með langa daga og hita í lofti. Frisbígolffélögin eru mörg komin með sumardagskrá og inn á viðburðadagatali folf.is/vidburdir má nú finna 99 viðburði sem skipulögð eru fram í október.
Við hvetjum ykkur öll til að taka þátt í þessu en boðið er upp á fjölda flokka á hverju folfmóti, þú finnur örugglega flokk við þitt hæfi.