Flestir líta á frisbídiska sem frekar einfalda hönnun þar sem flestir diskar líta svipað út en það er alls ekki raunin. Um er að ræða flókna hönnun og mikið úrval mismunandi diska með ólíka flugeiginleika. Til þess að skýra þetta betur tökum við sem dæmi fjögurra númera kerfið en það er algengasta kerfið til að greina eiginleika diska. Nokkrir framleiðendur nota það s.s. Innova, Lattitute 64, Dynamic Discs, Westside og Legacy. En hvað þýða þessar fjórar tölur sem stiplaðar eru á suma diska. Þær tákna hraða, svif, beygju og lokasveig.

Hraði (speed)

Hann er mældur frá 1-14 og er í raun mikilvægasta talan því hinar þrjár tölurnar taka mið af henni. Þessi tala er líka mest misskilda breytan því margir spilarar, sérstaklega byrjendur, halda að þetta sé sá hraði sem diskurinn flýgur á. Það er auðvitað eðlilegur misskilningur. Það rétta er að hraðatalan segir til um hraðann sem þarf að koma disknum á til þess að hann hagi sér eins og hann er hannaður til. Því hærri sem talan er því hraðar þarftu að kasta disknum.

Hraðatalan segir einnig til um það hvort diskur er pútter, midrange (miðari) eða dræver. Pútterar hafa hraðann 1-3, midrange eru með hraðann 4 eða 5 á meðan dræverum er yfirleitt skipt upp í tvo flokka, brautar-dræverar og lengdar-dræverar (fairway og distance). Brautar-dræverar eru yfirleitt með hraðann 6-8 en lengdar-dræverar eru 9-14. Hraðatalan skiptir miklu máli því ef kastarinn nær ekki að kasta disknum á þeim hraða sem hann er gerður fyrir þá virka ekki hinir eiginleikar disksins á þann hátt sem gefið er upp. Ef disknum er kastað á of litlum hraða verður hann oftast yfirstöðugur og leitar þá of mikið til vinstri.

Svif (glide)

Svifið er líklega það sem er auðveldast að skilja í flugi diska en það þýðir einfaldlega svifið sem diskurinn hefur á flugi. Svifið er mælt á skalanum 1-7 en flestir diskar eru á bilinu 4-6. Því hærri sem talan er því meira svif hefur hann.

Beygja (turn)

Þriðja talan segir til um það hversu mikið diskurinn beygir á flugi rétt eftir að hann leggur af stað, veltir sér til vinstri eða hægri. Stundum er líka talað um stöðuleika disksins á miklum hraða. (High speed Stability-HSS). Oft er talað um þrjá meginflokka í þessu samhengi; yfirstöðugan (overstable), stöðugan (stable) og undirstöðugan (understable). Skalinn er frá +1 til -5 en flestir diskar eru á bilinu 0 til -3.

Til að skýra tölurnar þá miðum við t.d. við rétthentann spilara sem kastar bakhandarkast en fyrir hann er +1 yfirstöðugur diskur og veltir sér því strax til vinstri, 0 er stöðugur diskur og fer því beint en mínustölur flokka diskinn sem undirstöðugann og þá leitar diskurinn strax til hægri eftir að honum er sleppt.

Undirstöðugir diskar eru frábærir fyrir byrjendur sem ná ekki þeim hraða og eiginleikum úr disknum sem vanari spilarar geta og fara því diskarnir oft frekar beint í flugi sínu sem er mikill kostur.

Lokasveigur (fade)

Síðasta talan táknar stöðugleika disksins á litlum hraða eða LSS-Low Speed Stability. Hún segir til um það hversu mikið diskurinn sveigir til vinstri þegar hægist á fluginu. Skalinn er á bilinu 0-6 en talan 0 þýðir að diskurinn lendir í nokkur beinni línu á meðan diskur með töluna 6 tekur krappa beygju til vinstri rétt fyrir lendingu (miðað við rétthentann spilara sem kastar bakhandarkast).

Nú er góðir tímar framundan í kjölfarið á því að sóttvarnareglur voru rýmkaðar á þann veg að mótahald getur hafist að nýju. FGR heldur sín fyrstu mót þessa dagana og má segja að áhuginn sé griðarlegur en nánast fullt er á fyrsta Kuldakastið sem er vikulegt sunnudagsmót. Þetta er góð vísbending fyrir sumarið þar sem við reiknum með met þátttöku.

Við hvetjum auðvitað alla til þess að framfylgja sóttvarnarreglum því þannig getum við haldið mótahaldinu áfram.

Nú er 2020 loksins liðið og við lítum björtum augum til komandi mánuða með hækkandi sól. Þó að margir hafi beðið spenntir eftir þessum tímamótum og viljað kveðja árið sem fyrst þá var nýliðið ár eitt það besta í sögu sportsins hér á landi. Aldrei hafa fleiri spilað frisbígolf og var fjölgunin gríðarleg enda auðvelt að stunda sportið og uppfylla þær sóttvarnarreglur sem í gildi eru.

Framundan eru spennandi tímar og vonandi getum við farið að lifa eðlilegra lífi hér innanlands sem fyrst.

Flestir vellir miðað við höfðatölu.
Þó að 2020 hafi verið skrýtið ár og margir geti ekki beðið eftir að það klárist þá var þetta mjög gott ár fyrir frisbígolfið. Átta nýir vellir voru byggðir á þessu ári og þeir nýjustu eru í Grímsey, á Þórshöfn, að Ásbrú í Reykjanesbæ og í Grundarfirði og voru settir upp núna á síðustu vikum. Auk þess fengum við nýjan 18 brauta völl í Reykjanesbæ og völlurinn á Selfossi stækkaði i 18 brautir en þeir eru þá orðnir fimm 18 brauta vellirnir á landinu.

Í sumar hafa aldrei fleiri spilað frisbígolf en algjör sprenging varð í vinsældum sportsins í sumar, vinsælustu vellirnir hafa verið þétt setnir og nú má sjá alla aldurshópa af báðum kynjum kasta diskum í allar áttir. Það var metþátttaka á þeim frisbígolfmótum sem við héldum í sumar sem náði hámarki á glæsilegu Íslandsmóti í ágúst en mótið er það langfjölmennasta sem haldið hefur verið hingað til en það var haldið á þremur völlum, Vífilsstaðavelli, Grafarholtsvelli og á Gufunesvelli.

Við lítum bjartsýn til komandi árs en metnaðarfullar áætlanir eru komnar í gang með nýja almenningsvelli, nýjan 27 brauta keppnisvöll, endurbætur á núverandi völlum og glæsilegri mótaskrá – við erum rétt að byrja!

Enn einn frisbígolfvöllurinn bættist í hóp þeirra 70 valla sem komnir eru upp hér á landi þegar nýr völlur á Ásbrú í Reykjanesbæ var settur upp í vikunni. Völlurinn er með 9 brautir og er virkilega gaman að sjá þennan mikinn áhuga sem er hjá íbúum á frisbígolfi en nú eru komnir fjórir vellir á Suðurnesjum. Í sumar var opnaður glæsilegur 18 brauta völlur í Njarðvíkurskógum sem hefur fengið góðar undirteknir.

Nú er sá tími ársins þegar sveitarfélög eru að vinna í fjárhagsáætlun næsta árs og taka þannig ákvarðanir um framkvæmdir næsta sumar. Það er því mikilvægt að lögð sé inn tillaga um að settur verði upp frisbígolfvöllur og miðað við uppbyggingu sportsins síðustu ár þá er ekki spurning að það er örugglega mikill áhugi fyrir því hjá íbúum.

Frisbígolf er eitt besta lýðheilsuverkefni sem hægt er að fara í um þessar mundir enda hentar þetta fjölbreyttum hópi fólks, ungum og öldnum, konum sem körlum sem öll geta stundað þessa frábæru íþrótt og varla hægt að finna betri útivist þar sem auðvelt er að halda öruggum smitvörnum í því ástandi sem núna er. Hafið samband við ykkar sveitarfélag í dag og sendið í framhaldi inn beiðni um frisbígolfvöll. Þið getið líka fengið aðstoð hjá okkur með að senda okkur erindi á folf@folf.is

Nú er sá tími ársins þegar sumarið hefur kvatt og haustið er skollið á með öllum sínum föllnu laufum. Frisbígolfvellirnir er í fínu standi núna, sérstaklega þar sem heilsársteigar hafa verið settir upp en kostur þeirra er augljós þegar jarðvegur er viðkvæmur og fólk losnar við að vaða drulluna sem myndast eðlilega. Við hvetjum alla til að drífa sig út og spila áður en frost og snjór þekur hér allt.

Nú eru óvenjulegir tímar og daglegt líf flestra hefur raskast verulega. Margir dvelja meira heimavið en þeir eru vanir og regluleg hreyfing er ekki sami hluti af daglegu rútínunni eins og að fara í sund, ræktina, spila badminton eða stunda aðra skipulagða hreyfingu. Það er því mikilvægt að fólk komi sér upp nýjum venjum, drífi sig út í göngutúra, fjallgöngur, hjólatúra og annað sem kemur blóðinu á hreyfingu.

Frisbígolf er eitt af því skemmtilegra sem fólk getur stundað í þessu ástandi enda fellur það vel innan þeirra marka sem sóttvarnaryfirvöld heimila. Þetta er góð hreyfing utandyra sem reynir bæði á huga og hönd og við hvetjum alla til að útvega sér frisbígolfdisk, (ef þeir ekki eiga hann nú þegar) og skella sér á einhvern þeirra 70 frisbígolfvalla sem eru hér á landi. Það eru bókstaflega vellir út um allt en nýjasti völlurinn var að opna í Grímsey í síðustu viku. Á höfuðborgarsvæðinu eru 13 vellir og það besta er að það kostar ekkert að spila á þessum völlum og þeir eru opnir allt árið.Frisbígolf er fyrir allan aldur og kyn, ekki þarf að bóka rástíma heldur að mæta bara á fyrsta teig og byrja að kasta. Þú getur séð alla vellina undir flipanum “vellir“.

Við hvetjum auðvitað alla til þess að huga að persónulegum sóttvörnum, spila ekki í stórum hópum og snerta ekki búnað annarra. Góða skemmtun.

Nú í vikunni var settur upp nýjasti frisbígolfvöllurinn hér á landi en sá völlur er staðsettur í Grímsey og er því nyrsti völlur landsins nánar tiltekið við heimskautabaug.
Það voru félagar í Kiwanisklúbbnum Grími sem stóðu að kaupum á vellinum og stýrðu uppsetningunni. Verkefnið var styrkt af Brothættum byggðum. Þess má geta að nú eru frisbígolfvellir í þremur eyjum hér á landi, Grímsey, Hrísey og Vestmannaeyjum.
Við hvetjum auðvitað alla til þess að leggja leið sína til Grímseyjar og spila þennan nýjasta völl landsins.

Í dag lauk Íslandsmótinu í frisbígolfi 2020 sem fram fór um helgina en aldrei hafa fleiri keppendur tekið þátt í frisbígolfmóti hér á landi.

Sigurvegarar urðu eftirtaldir:
Opinn meistaraflokkur: Blær Örn Ásgeirsson
Meistaraflokkur kvenna: Kolbrún Mist Pálsdóttir
Stórmeistaraflokkur 40+: Eyþór Örn Eyjólfsson
Stórmeistaraflokkur 50+: Stefán Þór Sigurjónsson
Almennur flokkur: Bjarki Freyr Kristinsson
Almennur flokkur kvenna: Guðrún Fjóla Guðmundsdóttir
Almennur flokkur 2: Sigurður Sigurjónsson
Almennur flokkur kvenna 2: Þórunn Eir
Almennur flokkur 3: Ívar Gíslason
Ungmennaflokkur 18 ára og yngri: Rafael Rökkvi Freysson
Barnaflokkur 12 ára og yngri: Ares Áki Guðbjartsson

Við óskum þeim öllum til hamingju!

Öll úrslit á mótinu má finna hér: https://discgolfmetrix.com/1411707