Núna í sumar ætlum við að taka í notkun forgjöf í keppnum í fyrsta skipti en til að byrja með verða það þriðjudagsmótin sem Frisbígolfbúðin heldur þar sem forgjöfin verður prófuð.

Tilgangurinn með forgjöf er auðvitað sá að gera mótin jafnari og skemmtilegri. Þannig virkar hún best ef sá vinnur sem á sinn besta dag miðað við getu. Bestu spilarar landsins eru þvi með lága forgjöf en byrjendur háa en forgjöfin á að endurspegla getu spilarans og er þá miðað við hvernig hann hefur spilað á undangengnum mótum þar sem forgjöfin hefur verið mæld.

Hvernig er forgjöf reiknuð úr í frisbígolfi?

Fyrir þá sem vilja skilja útreikninginn betur þá nota alheimssamtökin, PDGA, stigakerfi (ratings) þar sem þeir reikna út getu þeirra sem eru meðlimir sambandsins. Það virkar þannig að góður spilari fær 1.000 stig fyrir góðan hring á samþykktum velli, hvert kast sem aðrir spila betur eða verr en þessi meðalspilari telur 10 stig.

Dæmi: Leikmaður A spilar hringinn á 56 og fær 1.000 stig, leikmaður B spilar á 58 og fær 980 stig, leikmaður C spilar á 55 og fær því 1.010 stig.

Við notum þetta til grundvallar í forgjafarkerfið okkar, hver 10 stig gefa einn í forgjöf, miðað við að par vallar sé 72. Í flestum tilfellum eru vellir hér milli 50 og 60 par og því er forgjöfin aðeins breytileg eftir völlum.

Dæmi: Spilari sem er með 895 stig (PDGA rating) reiknast með 10,5 í forgjöf.              (1.000 stig eru 0 í forgjöf og 1.000 – 895 = 105. Deilt með 10 er 10,5 í forgjöf.)

Ef spilað er á velli með pari 57 væri ofangreindur spilari með 8 í forgjöf á þeim velli (10.5 x 57/72=8,3 sem námundast í 8 í forgjöf.)

Nú virðist veturinn vera að kveðja enda aðeins vika í sumardaginn fyrsta. Margir eru mættir út á vellina til viðbótar við þá sem spiluðu í allan vetur. Vorboðinn okkar eru yfirleitt mánðarmótin en það fyrsta í sumar verður haldið í dag (16. apríl) en þau eru haldin þriðja fimmtudag í hverjum mánuði yfir sumarmánuðina. Mótið verður haldið á vellinum í Mosfellsbæ og hefst kl. 18 en mótsstjóri er Jón Símon Gíslason. Keppt verður án forgjafar og í öllu flokkum sem eru A-, B-, C-, kvenna- og barnaflokkur. Mótsgjald er 2.000 krónur (1.000 krónur fyrir félaga ÍFS).

Þrátt fyrir óvenjumikinn lægðagang veðurguðanna í vetur þá hefur sá fjöldi spilara sem stundar frisbígolf yfir þessa köldustu mánuði ársin aldrei verið fleiri. Vetrarfolf er líka mjög auðvelt. Aðeins þarf að klæða sig vel, vera í góðum skóm og nota litsterka diska.

Í skammdeginu er líka hægt að nota litlar ljósadíður sem límdar eru undir diskana og gerir auðvelt að sjá þá og finna. Greinilegt er að margir hafa uppgvötað að frisbígolf er ekki síður skemmtilegt á veturnar heldur en á sumrin þó vissulega sé notalegt að spila í stuttbuxum á góðum sumardegi.   Við hvetjum alla til þess að drífa sig út á næsta völl og prófa áður en veturinn kveður endanlega.

Nú liggur fyrir mótaskráin fyrir árið en hún var kynnt og samþykkt á Aðalfundi ÍFS sem haldinn var fyrr í mánuðinum. Helsta breyting frá síðasta ári er sú að mánaðarmótin (þriðji fimmtudagur í mánuði) breytast flest yfir í Texas fyrirkomulag en það er gert til að gera mótin aðgengilegri fyrir fleiri. Einnig erum við búnir að semja við Frisbígolfbúðina um að halda mótaröð sem nefnist Þriðjudagsdeildin og verður spilað vikulega í þeirri mótaröð. Um leið verður tekið upp stigakerfi (ratings) sem er forgjafakerfi en það verður í fyrsta sinn sem við notum forgjöf hér á landi. Þeir sem vilja forgjöf þurfa að skrá sig hjá PDGA.

Hér er nýja mótaskráin.

Á þessum link geta áhugasamir skráð sig hjá PDGA en árgjaldið þar eru 20 dollarar.

Undanfarin tvö ár hefur orðið mikil fjölgun í framleiðendum frisbídiska enda mikill vöxtur í íþróttinni um allan heim. Þau fyrirtæki sem hafa komið með nýja diska á markaðinn sl. tvö ár eru nú 27 en um helmingur þeirra voru stofnuð á síðustu 3 árum. Á síðasta ári komu 70 nýjir diskar á markaðinn sem samþykktir voru af PDGA en alls eru 686 ólíkir diskar í boði fyrir þá sem hafa áhuga á að eignast einn af hverjum. Fyrir tíu árum komu rétt um 25 nýjir diskar á ári. Á þessu ári bíða allir spenntir eftir nýjum diskum með tölvuflögum sem gefur möguleika á flugupplýsingum í símann svo ekki sé talað um leitarmöguleikana að týndum diskum.

Nú í vetur hefur orðið mikil aukning á þeim sem spila frisbígolf og það þrátt fyrir erfitt tíðarfar, mikinn snjó og leiðinlegt veður. Ólíkt hefðbundnu golfi þá er frisbígolf mjög auðvelt við þessar aðstæður og auk góðs klæðnaðar þá þarf aðeins að skilja hvítu diskana eftir heima. Við hvetjum alla til að prófa sem ekki hafa kastað diskum í snjó.

Aðalfundur ÍFS var haldinn þann 11. mars sl. og fór vel fram. Farið var yfir skýrslu stjórnar fyrir starfsárið 2014 en þar bar hæst fjölgun valla úr 7 i 19 og fjöldi móta úr 10 í 25. Samfara þessu varð auðvitað gríðarleg fjölgun spilara og þá sem kynntust þessu dásemdarsporti á árinu. Fleiri vellir eru á döfinni og nú er komin staðfesting á 5 nýjum völlum og annað eins í samþykktarferli.

Mótaskrá fyrir 2015 var kynnt og samþykkt og kemur á næstu dögum hér inn á vefinn. Þar ber helst að Frisbígolfbúðin stendur fyrir Þriðjudagsdeild sem verður vikulega í vor og ef vel tekst til þá verður framhald á henni í sumar. Mánaðarmótin verða áfram en verða flest eftir svokölluðu Texas fyrirkomulagi.

Birgir Ómarsson og Kristinn Arnar Svavarsson voru endurkjörnir í stjórn og mun fulltrúi mótanefndar bætast i stjórnina á næstu vikum. Þorsteinn Óli Valdimarsson óskaði ekki eftir endurkjöri og eru honum þökkuð hans störf á liðnu ári. Mun hann einbeita sér að endurbótum á Gufunesvelli og mögulega stofna fyrsta klúbbinn um þann völl.

Ákveðið var að halda sérstakan fund um Gufunesvöllinn en hann verður haldinn miðvikudaginn 25. mars kl. 20 í Gufunesi. Jón Símon Gíslason mun leiða þá vinnu í samstarfi við stjórn ÍFS.

Um leið og við óskum öllum gleðilegrar hátíðar þá er ekki úr vegi að líta björtum augum á komandi ár sérstaklega með tilliti til ársins 2014 sem var það stærsta í þessari ungu íþrótt sem frisbígolfið er.

Árið 2014 fjölgaði folfvöllum úr 7 í 18 auk þess völlurinn í Gufunesi var stórlega bættur með nýjum körfum og fjölgun teiga. Á höfuðborgarsvæðinu bættust við 5 vellir og segja má að þeir hafi allir slegið í gegn með Laugardalinn og Fossvoginn efsta á lista.

Með þessari fjölgun valla varð um leið mikil aukning á fólki sem uppgvötaði folfið og heillaðist af þessari frábæru íþrótt. Í sumar og haust voru vinsælustu vellirnir troðfullur á góðviðrisdögum og mikið af nýjum andlitum sem sjást örugglega aftur næsta sumar.

Fyrir liggur að vellirnir á Húsavík og Bolungarvík verða settir upp í vor auk þess sem nýr völlur í Glerárhverfi á Akureyri verður settur upp um leið og snjóa leysir. Mörg sveitarfélög til viðbótar eru áhugasöm og ljóst að enn fleiri vellir koma upp 2015 sem er auðvitað fagnaðarefni fyrir okkur.

Það er orðin hefð að byrja árið með “áramóti” sem haldið er fyrsta sunnudag ársins kl. 13 á vellinum í Gufunesi. Þetta árið er mótið 4. janúar og öllum opið, ekkert keppnisgjald.

Nú þar sem sumrinu er lokið og dagur styttist tekur skammdegisfrisbígolfið við. Við notum sjálflýsandi diska og ljósabúnað til að berjast við rökkrið, en við hljótum öll að geta sammælst um að ákjósanlegast væri þó að birtunnar nyti lengur við.

Nú liggur fyrir Alþingi þverpólitísk þingsályktunartillaga um að færa klukkuna á Íslandi aftur um eina klukkustund allt árið. Fyrir þessu liggja auðvitað ýmsar góðar og gildar ástæður, en þær miða flestar að því að “flýta sólarupprás” ef svo má að orði komast, og fjölga þar með þeim dögum þar sem við Íslendingar getum skundað til vinnu í björtu, enda þykir það hafa merkjanleg áhrif á árstíðabundið lundarfar.

Óhjákvæmilegu afleiðingar þessa, sem þó sjaldnar dúkka upp í umræðunni, eru þó þær að ef við færum klukkuna til að þessu marki þá styttum við daginn að sjálfsögðu í seinni endann, og flýtum sólsetri þar af leiðandi um þennan sama klukkutíma.

Fyrir okkur, sem og aðra sem kjósa að stunda útiveru í lok vinnudags, þýðir þetta að síðdegisbirtan hverfur á veturna, og frisbígolftímabilið þar sem hinn almenni dagvinnumaður getur leikið á virkum dögum styttist um ca. 2 mánuði að ári, einn að hausti, og annan að vori.

Hér má vera að samfélagslegur ávinningur sé það mikill að þessi rök vegi léttvægt, en miðað við hversu óhagstætt tíðarfarið hefur verið okkur síðustu tvö sumur, væri afar dapurt ef við útivistarfólk töpuðum sömuleiðis þessum tíma.

Fyrir þá sem vilja kynna sér málið frekar:
http://www.althingi.is/altext/144/s/0421.html
http://mennta.hi.is/vefir/staerdfraedi/lif_og_starf/solargangur.htm

7 laugardagar – 7 mót – 7 vellir.

Ákveðið hefur verið að gera tilraun og halda létt haustmót næstu 7 laugardaga á völlunum á Stór-Reykjavíkursvæðinu og hefjast þau alltaf kl. 13 en spilaðar verða 18 brautir. 
Keppt verður í einum opnum flokki og veitt eru verðlaun fyrir efstu þrjú sætin. Keppnisgjald er 2.000 kr (1.000 fyrir félaga ÍFS).

1. nóvember – Breiðholtsvöllur (Birgir keppnisstjóri)
8. nóvember – Mosfellsvöllur
15. nóvermber – Viðistaðatún (Brjánn keppnisstjóri
22. nóvember – Gufunes (hvítir)
29. nóvember – Laugardalur
6. desember – Fossvogsvöllur
13. desember – Klambratún

Okkur vantar keppnisstjóra fyrir mótin (tekur á móti keppendum og mótsgjaldi, skiptir í holl og afhendir verðlaun). Áhugasamir sendið mail á folf@folf.is